المصادر المفتوحة‏‏منهج للتنمية وليست صراع منتجات

أولا بالنسبة لجوجل سايبة الفيلم ليه فحماية الفيديوهات المحمية بحقوق ملكية في جوجل منعدم.. وكذلك في الموقع التابع لها يوتيوب أيضا.
وأعتقد إن حذف المواد دي بالنسبة لقوانين يوتيوب لازم صاحب حقوق الملكية نفسه هو اللي يشتكي.. وطبعا ده هيبقى وجع دماغ لأن الفيديو هيترفع مرة تانية تاني يوم وعادي جدا.. علشان كدة بيبحثوا تطبيق وسيلة لمنع المواد دي.
المهم بالنسبة للمقالات والصحافة فأعتقد إنه العكس تماما.. لأن معنى كدة إن ممكن أي صحيفة تقوم ببساطة ناقلة المقالة وناشراها عادي ولا مشاكل.
بالنسبة للمطلوب هو عدم إنكار حق المؤلف.. ما هو حق المؤلف إذا؟؟؟
ربما يكون حق المؤلف ذكر اسمه.. أو حق المؤلف هو عدم نشر المقالة في أي مكان آخر.. أو .. أو..
دي حاجات بيحددها المؤلف للعمل.. سواء كانت جميع الحقوق محفوظة.. أو بعض الحقوق المحفوظة.. أو أن العمل للاستخدام العام Public Domain أو غيرها من الحقوق التي يحددها هو.
وإذا ما حددش؟؟؟
في القوانين المصرية ما اعرفش إيه الوضع بالنسبة لدا...
لكن بالنسبة للقوانين الأمريكية أو بشكل عام Berne Convention
a work is automatically protected by copyright when it is created


القصد أنه لا يمكن افتراض أن حقوق المؤلف هنا هي ذكر المصدر أو ذكر اسمه طالما هو لم يحدد ذلك.

محتوى موقع أندلسي يخضع لرخصة Creative Commons Attribution-NonCommercial-ShareAlike
هذه نقطة أخرى أيضا... لأن مع توضيح ذلك يجب تحديد أيضا عند ذكر مقالات منقولة أن المقالات المنقولة لا تخضع لهذه الرخصة.. لأن حينها نكون نقلنا ما ليس لنا حقوق عليه وفرضنا عليه رخصة من أنفسنا وهذا غير جائز إطلاقا
أنا قرأت رخص مجموعة من الكتب ورخصة هذه الكتب تقول بما فيه معناه بأنه يمنع نقل أي جزء من الكتاب إلا بغرض المراجعات review بدون إذن من الكاتب...
لكن هذه أيضا ليست الحالة هنا لاننا لن نفترض الرخصة التي يخضع لها العمل.
واضح طبعا إننا مزنوقين وخلافه... وده السبب الأول لحركة البرمجيات الحرة .. وهي معارضة قوانين حقوق الملكية.. ولكن بما إننا مش هنلغي القوانين فعملوا الرخص في إطار حقوق الملكية.. لكنها في الواقع ليست حقوق ملكية.. وتعطي الناس حق المشاركة والنشر بدون قيود...
ده اللي احنا بندعمه... لأنها طبيعة البشر إنهم يتشاركوا بما يصلوا إليه وده اللي بيدفع عجلة العلم..
لكن لا نستطيع إرغام الآخرين على المشاركة.. ولابد من احترام حقوق الناس حتى المحتكرين منهم... فليس من أجل الحرية نتعدى على حقوق ميكروسوفت مثلا.. هي فرضت حقوق على أعمالها... وعلينا الالتزام بها...
بالنسبة للمقالة فهذا هو المنطق البشري... قرأت مقالة.. يبقى ليه ما انقلهاش للناس؟؟؟ إيه اللي يمنع؟؟ تمام وصح وأنا معاك جدا.. وهو ده الهدف الأساسي لدعم حرية البرمجيات وحرية الاعمال الأدبية والفنية
لكن حقوق الملكية الفكرية لا تتعلق بالمنطق البشري.. فإذا أراد صاحب العمل أن يفرض حقوق أو قيود بمعنى أصح على عمله فهذه حريته الشخصية.. ولا يجوز لنا الاعتداء عليها..
فأقترح أن تتم مراسلة الكاتب واستئذانه في نقل هذه المقالات هنا.

اﻷزمة يا أخي حسن لم تكن في مراسلة اﻷستاذ غيطاس ... الموضوع تقعيد قواعد .. يعني احنا مفروض ننتهج نهج المثال ده على قضايا كتيرة جدا ومشايهة .. وبالتالي اللي هنوصله في المناقشة دية ... هيبقى مهم وضروري لقضايا أخرى مماثلة
ومن هنا أهمية هذه المناقشة :::
من ناحية مقالات اﻷستاذ غيطاس مش شايف أزمة ... بسيطة طب ما الواحد يعمل لينكة على أرشيف اﻷهرام طوالي .. مش هية دية اﻷزمة
بس اﻷزمة إني احنا نيجي في يوم من اﻷيام ونلاقى كتاب معين بيعالج قضية معينة وتحت ترخيص معين انا مقدرش استخدمه ... فنقول يا جماعة مش مهم العلم واﻷهم الحقوق الفكرية للراجل ... على فكرة انا مش موافق على موقف زي ده واستحالة هوافق ...
الموقف ده بيفكرني باللي المسلم الي مسكوه اﻷعداء وبيسألوه عن أحوال البلد .. فقالك حرام أكدب ..
على فكرة انا لا احبذ مناقشة قضايا اخلاقية شائكة كهذه.. ولكن لا تنسى ايضا انه احيانا كثيرة تتشابك مفاهيم وقيم عدة لا يصلح معها معالجة اﻷمور بهذا التحييد المطلق ...
انا لا أريد اﻷطالة ولكني اطمح إلى اﻷتفاق ... فلا شك هذا موضوع مهم وخطير جدا

شوف اهو انت فهمت مقصدي غلط ... يا سيدي طبعا كل كلامك صح وقضية غير قابلة للنقاش أصلا ... ومحدش يقدر ينكر الحقوق اللي انت بتتكلم عليها
بس هو ده اللي كان مقصود من مثال المسلم ... الحيادية المطلقة اللي عامل بيها الموضوع لما الناس سألوه عن معلومات حساسة جدا عن البلد فقال في قرارة نفسه مينفعش أكدب ....... ده دليل على تعامل حيادي مطلق لقضية تحمل في طياتها تشابك معقد جدا ... يعني الناس هتقعد علىا لويندوز ازاي ... طلاب الجامعات هيتوفرلهم مراجع غير منسوخة ازاي .. وهكذا دواليك
بالمختصر المفيد محدش قال هيقتحم ... بنقول إنه فيه سبيل تاني ينفع نجيب منه المراد بإغفال حقيقة الملكية الفكرية ... يعني مفيش اقتحام ولا حاجة
واديك جبت المثال اﻷهم اللي نفسه أقوله .. هما الناس اللي بدأوا المصادر المفتوحة أصلا ... حاربوا اﻷحتكارية ازاي يعني ... وفروا البديل ... لكن مقعدوش يقولوا ده ينفع وده مينفعش
وبالتالي اﻵن نحن في مرحلة توفير البديل ... لما يكون 90 في الماية من متصفحي الموقع ده قاعدين دلوقتي على الويندوز -احصائية دقيقة- ...
أقولهم يا حرامية وسارقين حقوق الملكية أقفلوا الجهاز وحافظوا على حقوق الملكية ... طبعا كلامي صح مية في مية ... هما محافظوش على التراخيص ويعتبروا حرامية في ظل القانون ... لكن في نفس الوقت كلامي فيه تحييد مطلق لمفاهيم كتيرة جدا .. وبالبلدي كده تحس إن كلامي مش منطقى وغير موزون
وانا هاعيد وأقول الناس اللي بدأوا المصادر المفتوحة كلها كان همهم توفير البديل .. وبعدين نتكلم
لكن مكانوش قاعدين يتكلموا خالص عن الملكية الفكرية ... ونرجع تاني لموضوع خطوة خطوة ... مفيش حاجة بتقوم في يوم وليلة
كلمة أخيرة طبعا أنا مكنتش اتصور إن الموضوع هيسحبنا كده ... بس برده إنت مردتش عليا ايه اللي كان هيحصل لو كنت عملت لينكة للأرشيف اللي موجود فيه المقالة ...كان الموضوع مكنش اتفتح ... واتناقشنا المناقشة المهمة دية ...
:D :D

مدام منطق الحيادية ده مش عاجباك ... خلاص ممكن نوصل لمنطق اﻷسئلة المفتوحة
دائما وابدا ستظل اسئلة مفتوحة واشكاليات معقدة تحتاج منا إلى الكثير من التفكر والتعمق :
انا بدأت حياتي الكومبيوتررية أصلا ويندوز ولا لينكس ؟؟
طبعا ويندوز مش مترخص .. فكان المفروض مبدأش ... وبالتالي مكنتش عرفت حاجة اسمها لينكس أصلا ؟؟؟
واحد تاني يسأل يقولك ...اندلسي وصداع ... لينكس ده ملقيتش عليه كذا وجي اعمل ملقتش عليه كذا ولما برده ملقتش كذا ؟ وكل ده كان موجود على الويندوز ؟
ومن قبيل هذه اﻷسئلة الكثير والكثير وفي مجالات تانية أخري ايضا
ومن هنا يتضح لللي عايز يجاوب على اﻷسئلة دية إني زي ما بيقولو في اكتر من مجهول في المعادلات دية -قاصدي اﻷسئلة - ليه في ناس كتيرة جدا بتحلها في مجهول واحد ...على الرغم انها محتاجة اكتر من ذلك
طبعا مثال المجاهبل والمعادلات يمكن يكون مقصر ... بس قاصدي اوضح معضلة اﻷسئلة المفتوحة
وهو ده انتهاجي عالم المصادر المفتوحة ... كله عايز ينتهجه على طريقته ... بالنسبة لي انا منتهج الفكر ده كثقافة انفتاحية لا كالتزام اخلاقى ... ﻷن ده هيلزمني بالتزامات تانية اكتر أنا غير قادر على حلها ... وبالتالي بشعر بواقعية لنظرتي للمشكلة كلها ... غير إن حد يقولي ده حرام أو التزام اخلاقى معتقدتش إني هقدر هكمل أصلا في الطريق
وبالنسبة للمحاضرات اللي حضرتك اتكلمت عليها ... انا عجبتني جدا وبالذات بتاعة براءات اﻷختراعات Patents ... بس برده كان قاصدي إنهم اتكلمو بعد لما وفروا بديل ... وإن كان حتى اﻵن منقوص نوعا ما ... لكن rms اتكلم عن gzip وقال إن احسن برنامج للضغط في المحاضرة اللي انا بتكلم عليها دية أصلا .. طب كان هيقول الجملة دية ازاي لو كان موفرش البديل ........

أخيرا بالنسبة للمقالات ... للأسف مقالات العدد ده من لغة العصر دخلت في خدمة اﻷرشيف التابعة لنمرة الخمس خمسات دية ... وبالتالي ملقتش بودرة ولا كريم .. قاصدي معرفتش اشغل اللينكة ... لكن مع ذلك تم حجب المقالات كلها ... مش عارف ليه بصراحة ...... بس عالعمو هما اتحذفه خلاص ...من قسم برامج حرة أو روابط تربط عليهم
وعلى فكرة لقيت لينكات للمقالات دية بس منتهكة ؟ ينفع اربط عليهم
هههههههه

أخيرا مش عارف اقول ايه بس احنا من بعد ما وصلنا لخانة اليك بدأنا ندور حولين نفسينا .. ليه ﻷني ببساطة الموضوع ده كده

انا مش موافق على فكرة اﻷلتزام اﻷخلاقي هي أهم ما في الموضوع - انا شايف كده- ....
وفيه دلائل كتيرة على كده
أولا ...وانت كده فكرتني بالخلاف ما بين ايريك ريموند وريتشارد ستالمان .. على مفهوم المصادر المفتوحة ذات نفسه ... ﻷن طبعا ريتشارد مش عاحبه المفهوم ده "المصادر المفتوحة" أصلا وخايف على الفلسفة والمصطلحات اللي ورا "البرمجيات الحرة"
يعني هما نفسهم منقسمين على ذاتهم ... ليه احنا عايزين نصور الموضوع إني فيه دين جديد ظهر هناك ... ليه انا مش عارف
--ملحوظة-- مفهوم الدين الجديد هذا قرأته أول مرة على جنو/لينكس مصر ... بس حقيقية لا اتذكر من هو صاحب هذه المقولة

ثانيا : لما لينكس كان لسه محتاج SCM أو برنامج ﻷدارة مشروع الكيرنل ذات نفسه .. استخدم Bitkeeper اللي هو تحت مفهوم الproprietary software الحاجات العجيبة اللي بنقعد نتكلم عليها دية وبرنامج يقيد لحرية المستخدمين وحرية المطورين وحرية النملة اللي ماشية على الكومبيوتر بتاعك من الساعة كذا للساعة ... والكلام اللي اي حد مفروض يقتنع بيه ومحدش يقدر يخالفه .. يا عم انا بكلمك عن حريتك هتقولى ﻷ ... طبعا متقدرش
لكن لينوس ذات نفسه مكنش شايف الموضوع كده واستخدم البرنامجBitKeeper ﻷدراة أهم مشروع قاعدين نتغني بيه ... مشروع الكيرنل ولغاية لما طور مشروع GIT ﻷدراة الكيرنل الخاصة بيه ... وهو ده اللي احنا مختلفين فيه من الصبح هما اتكلمو اﻷول ولا وفروا البديل وبعدين اتكلموا

طبعا لينوس مسرقش البرنامج ولا حاجة ... بس ده كان مثال على موضوع اﻷلتزام اﻷخلاقى ده

ثالثا : انا بتكلم دلوقتي في حدود واقعي وحدود واقع أي حد من المحيط الهادر للخليج الثائر .... انا لا أقدر اشتري ويندوز ولا اقدر اشتري كتاب من أمازون هيعلمني حاجة عن اللينكس أو غيره ولا أقدر ولا أقدر أعمل حاجات كتيرة خالص ... يعني مش عاجباك صراحتي وكنت عايزني أقولك آه التزام أخلاقى ... ﻷ طبعا انا صريح معاك في نقطة زي دية بالذات

أخيرا : واضح يااستاذ حسن إني وسط الصراحة المطلقة دية .. مقدرش أقولك يلا نخلينا ويندوز ...لكن أقدر أقولك ممكن نذاكر ممكن نطور نفسينا ممكن نوفر بديل ... ايه الدافع اذا ما كانش التزام اخلاقى ... ليه عايز تقتنع إن الناس دية محركها التزام اخلاقى مدينا جيبنا مثال لينوس اللي قاعدين بيعبدوه عشان عمل الكيرنل ... يا أخي الديان التلاتة نزلت عندنا ومكنتش الرسالة في يوم من اﻷيام من ناحية الغرب خالص ... ليه عايزين نرسمهم على انهم قديسين ... دية ناس ليه دوافعها واحنا لينا دوافعنا ... وينفع نزود ونطور دوافعنا ... لكن منكبلش نفسينا بحاجات ممكن منتخلاش نتحرك أصلا

طبعا متنساش إنك زودتها عليها طبعا في موضوع اﻷلتزام اﻷخلاقى ده .. وحسستني إني ماكيافلي أو أبو جهل ... بدرجة جرحت شعوري :D
وبعدين يا أخي انت متكلمتش خالص إني شلت المقالات اللي ولعت المناقشة العجيبة دية ... انا شلتها أمال لو كنت خليتها كنت قولت ايه .... ههه
تعقيب :
هما منقسمين على نفسيهم احنا اللي هنوحدهم

كان من اهم اسباب الجانب البناء من هذه المناقشة إني احنا كنا هادين وبناقش بعضينا بمنطق هادئ
لكن طبعا انا اللي عليت النبرة من أول ما ما ذكرت موضوع النملة .. يعني اظاهر النملة كانت السبب ؟
فأنا بعتذر يا سيدي
لكن عودة مرة أخري للموضوع ... من ناحية خلاف ايريك وريتشارد ... كان قاصدي اختلافهم على المفاهيم والرؤي ورا الثورة كلها ... ناس شايفاها Open Source وناس شايفنها برمجيات حرة Free Software
وللمزيد من التفاصيل ممكن متابعة هذه المقالة

ومن ناحية لينوس في ردك اﻷخير انكرت عنه اﻷلتزام اﻷخلاقي وبعدين الصقته بيه ... وده في حد ذاته تناقض خطير جدا
فلو هو كان التزام اخلاقي ... كان قال ﻷ مش هرضي إني أدير مشروع الكيرنل "مفتوح المصدر"ببرنامج "مغلق المصدر" بيقيد حرية المحتمع ... مفروض مكنش يستخدم البرنامج ... وينسي المشروع بتاعه عقبال ميخلص المشروع الموازي للبرنامج BitKeeper

أما هو طور مشروع GIT ليه ... فده نفس السؤال اللي انت قولته وبتقول مش عارف هو حط النواة تحت الGPL ليه ؟؟

وبعدين في مسألة خطيرة جدا ... مفيش اكتر من نواة ولا حاجة ... وهو ريتشارد قاعد يترجي الناس ويقولهم يا جماعة قولوا جنو/لينكس ومتقولوش لينكس بس ... ده معناها إن نواةHURD لسه في غياهب التطوير ... فمفيش اكتر من نواة ولا حاجة .. لينوس بقى عنده مجتمع تطويري من العالم كله واللي حصل حصل ... إذا كان حد عايز يبني نواة من اﻷول فأنا هتابعك آه .. هاساعدك آه ... لكن مش هستناك في حاجة اسمها نواة لينكس خلصانة وشغالة وكله تمام

من ناحية إني هنشر برامج غير مرخصة على الموقع أو كتب غير مرخصة ... طبعا انا مقدرش ... ﻷن قوانين الخادم لا تسمح بذلك ... فمش هي دية اﻷزمة خالص
اﻷزمة اللي انا بتكلم عليها هو انا وانت والناس ... انا ممكن استخدم حاجة غير مرخصة ... متوفرة من سبل أخري ... لقضاء حاجاتي ... واللي هي لسه متوفرتش في عالم البديل الحر ... زي ما كنت قاعد على الويندوز ومش حاسس بأي حاجة خالص ... ولا تراخيص ولا حرية. وطبعا ده وضع الناس
لكن انت مش عايز كده ... بتقول دلوقتي انا عندي مشروع عايز مني استخدم برنامج AUTOCAD ... بتقولي ﻷ روح وفر البديل واستخدم البديل الحر ... بدل لما ميبقاش عندك التزام اخلاقي ... أيوة كلامك على العين وعلى الراس .. بس لا انا مبرمج خارق لدرجة زي كده ... ولا عالم البدايل الحرة بيوفر حاجة زي البرنامج ده لغاية دلوقتي ... طبعا واضح إن السؤال مفتوح ... لحسن حد يجي يقولي ليه مانت عندك برنامج كذا بيعمل اللي بيعمله البرنامج واكتر كمان ......

وبعدين أخيرا ... ليه عايز تحسسني إني خلاص ميكروسوفت دية طالع عينيها وبقت مفلسة خلاص .. عشان احنا بنستخدم برامجها من دون تراخيص ... ده العكس تماما ... كل لما بنعتمد عليه اكتر واكتر هما بتزداد احتكاريتهم وسطوتهم

ومن هنا يجي اﻷساس اللي احنا مفروض نتجمع عليه ... اساس البديل .. اساس المعرفة ... اساس العلم ... اساس التبادل المعرفي ما بينا ... وضعنا كناس في عداد المتخلفين كتأخر والدول النامية ... يحضنا على التجمع والتعلم والتبادل والتناقش ... هي دية مفروض تبقى دوافعنا ... ومش هقدر لما اشوف واحد بيذاكر من كتاب مهم جدا اقوله متذاكرش ولا بيستخدم برنامج أهم منه أقوله ﻷ ... عشان ببساطة احنا لسه اليد السفلى ... لما اقوله ﻷ ... يعني قتلته ... ولو سمحت متحاولش تقنعني إن لما قوله ﻷ يبقى هو ده الدافع ليه للتعلم وانتاج برمجيات والعيش في رخاء وسلام ... طبعا استحالة

وهو ده اللي قاعدين بنحكي فيه من اﻷول هل هذا اﻷلتزام اﻷخلاقى سيكبلنا أم سيجعلنا ننطلق ؟ هذا مربط الفرس ... انا عرضت رؤيتي في كيف سيكبلنا ... وارجو ان اعتمد رؤية من يري انه سيجعلنا ننطلق ....

اللي هيخليني أروح للبديل الحر لما يتوجد ... اقتناعي بأهمية المعرفة .. اقتناعي بأهمية التبادل المعرفى ... اقتناعي بأهمية حق المعرفة المكفول للجميع ... اقتناعي إني مش هينفع ازود سطوة واحتكار الشركات العملاقة دية ...اقتناعي بأهمية طريقة التطوير اللي بيتبرمج بيها البرامج المفتوحة المصدر ... واقتناعي ﻹني مفيش أي اقتناع من الفناعات دية كان التزام اخلاقي

طبعا مش هينفع نحكم على وضع اﻷستخدام الشخصي ونواة اللينكس دلوقتي خالص ... ولا احنا مؤهلين لده ولا احنا في صدد ده ... ولو اكتر من واحد زي المطور المهم ده خرج من تطوير اللينكس برده مش هنقدر نحكم كده ببساطة ... ﻷنه ده فيه دنيا وبيزنس وشركات قايمة وبتراهن على اللينكس للمستخدم الشخصي .. فأعتقد وتحاشيا للمواضيع الغريبة اللي انا بدخلها في النص دية وانت اشتكتني في كده ,... نتحاشى التفاصيل دية

وبالنسبة للخيار التالت ... " استخدام النسخ الحرة وتشجيع الأعمال الحرة المفتوحة المتاحة للجميع"
ما هو ده هدف اندلسي وغير اندلسي واي موقع نفسه يتكلم عن الثورة دية ...
ليه بقى احنا عايزين نفرق نفسينا ونتشرذم تشرذم فوق التشرذم اللي احنا فيه اصلا
هو ده فعلا الهدف ...يا أخي حسن مفروض دوافع اﻷفراد لا تعنينا في أي شئ ... مديك شوفت انا نفسي اقتحمت الثورة دية وبقيت في صفوفها من غير التزام اخلاقى واملك دوافع تخليني مقولش كلمة ويندوز دية على لساني .. وكل ده من غير اﻷلتزام اﻷخلاقى ... اللي انا مش مقتنع هو ده دافع اللي بدأوا الثورة ذات نفسيهم

ويا سيدي بقول تاني احنا بندور على اللي يجمعنا مش يفرقنا ... انت التزامك اخلاقي ناحية المشروع ده ... وانا التزامي معرفي ناحية المشروع ده ... مش هيضرك ولا هيضرني في شئ ... المهم الهدف اللي انت ذكرته في ردك اﻷخير
استخدام النسخ الحرة وتشجيع الأعمال الحرة المفتوحة المتاحة للجميع

التبادل المعرفة وأهمية نشر العلم ... هي علاقة تكافلية تصالحية يحكمها مصلحة تكافل الطرفين وتكاملهم ... انا عايز اتعلم وانت عايز تتعلم .. انا ممكن أكون شاطر بس فيه ناس اشطر مني اتمنى اتعامل معاهم ... لكن مش أقدر آجي في نص تعاونا وألاقي تخاذل من أحد الطرفين المتعاونين .. الاقي طرف بينادي التاني ويوقله باسم اﻷخلاق أو باسم المعلم اﻷكبر ريتشارد ستالمان .. وهو ده اللي قصدته بإن مفيش التزام اخلاقى ولا حاجة

بل على العكس تماما ... لو هو ده كان المحرك اﻷساسي والمنطلق لهذه الثورة لكانت اضمحلت واندثرت من قبل أن نولد أصلا ...
"مفيش نواة تانية ولا حاجة" المقصود بيه نواة متكاملة لها هذا المجتمع العريض من المطورين والدعم اﻷعلامي والعالمي

لكن انا تعابني حاجة شوية الفترة دية ... إني نفسي الخص الخلاصات اللي توصلنالها للتوثيق ؟
نفسي استنتج هل نحن من المناقشة دية وصلنا للتعاون ولا للتضاد .. كيف ترى هذه المشكلات ؟

>>بالنسبة للتعاون والتضاد فاختلاف الرؤى وارد
كويس إني احنا وصلنا للأستنتاج زي ده ... بس خليك فاكر إني كل ردودك كانت تخلى من أهم شئ دايما كنت بتستخدمه ... :D ...
ليه !! معرفش
بس اظاهر إني المعركة كانت حامية جدا ... تم بحمد الله