حزم RPM

Clear

1

2

3

4

5

6

7

تقييم كلي: 6 (أصوات:2)

أكتر مرحلة بيظهر فيها إن ويندوز مش لينكس ولينكس مش ويندوز ...

ازاي يعني ؟

يعني كلنا عارفين إن البرامج بتثبت لوحديها في الويندوز ؟

ايه يا عم انت مش عارف وبعدين بتكلم ﻷ طبعا مش بتثبت لوحديها ولا حاجة

أنا بفضل ادوس التالي التالي (Next Next) وبعدين البرنامج بينزل

يعني برده بتنزل لوحديها صح ولا ﻷ

طب أمال بيسبوني ليه أقعد أدوس التالي التالي ... عشان يضحكوا عليا يعني ؟

ﻷ... عشان يسيبولك مجال ضيق شويتين من بعض الخيارات المتاحة ...
مثلا عايز تبدل مكان تنزيل البرنامج ... عايز ايه ينزل وايه مينزلش وهكذا

طيب أمال اللينكس مختلف في ايه ؟
مختلف في حاجة مهمة جدا ... وهي حاجة بتميز بيئة اليونكس عامة ... وهو القانون المهم اللي بيقول إن كل برنامج مفروض يعمل حاجة ضغيرة ويمكن تكون تافهة بس يعملها صح قوي ... ومن هنا تظهر المميزات

1. أغلب البرامج هيبقى حجمها ضغير نوعا ما بالنسبة للوظيفة اللي بتأديها
2. أغلب البرامج هيبقى استخدامها للذاكرة استخدام مثالي
3. أغلب البرامج هيكون اعادة تعريفها وتوزيعها سهل جدا

وطبعا مفيش حاجة ليها مميزات إلا وليها عيوب

1. كل لما مساهمات مجتمع المصادر المفتوحة هتزيد هيزيد معاها معدل اﻷعتمادية بنسبة كبيرة جدا ... بمعني إن ممكن برنامج بسيط جدا في نظرك ممكن يكون معتمد على تلات أو أربعة مكاتب برمجية على كام برنامج كمان ... وعشان حضرتك تنزله تلاقي نفسك هتنزل أربع أو خمس برامج قبله
2. هم زمان كانوا بينزلوا البرامج كده ولغاية دلوقتي ينفع تنزلها بالطريقة دية بس محتاجة مستوي متقدم من الصبر وطول البال وادراك للهدف عالي جدا

ومدام ظهرت عيوب لازم يبقى فيه حلول ... وطبعا مفيش حد يقعد سنين عمره يحلل في العيوب من غير حل غير ناس كلنا عارفينهم طبعا


المهم ... نرجع تاني للموضوع
الحل هو أداة تثبيت ذكية تحتوي على قاعدة بيانات بكل البرامج المثبتة وتحتوى أيضا على أداة لحل مشاكل اﻷعتمادية والتنويه عنها وتحتوي وتحتوي وهكذا

كويس قوي ايه هية اﻷداة ديه ... نفس الحال طبعا في عالم اللينكس ... لا مجال للأداة الوحيدة والمطلقة والتي يستخدمها كل الناس شاءوا أم أبوا

فيه عدة أدوات وفيه الطريقة اﻷصلية لتنزيل البرامج وفيه أدوات أذكي مبنية على اﻷدوات اﻷصلية وهكذا ...

يعني ايه أقصدك مشاكل اعتمادية برده؟
ﻷ... طبعا مش معقولة ... أظن كده يبقى عبط مش تنوع ولا حرية

أنا قصدي إني الخيارات البديلة متاحة وموجودة ومعتمد عليها كمان .. عشان متتعودش على حاجة وتفتكر إني اللي مش زيك ده مسكين ولا عبيط ... انسي حوارات اﻷهلي والزمالك ديه .. إذا سمحت ومؤقتا

أول أداة هنتكلم عليها هيه RPM = Redhat Package Manager

طبعا زي متكلمنا دايما اﻷصل هيه الريدهات وهيه اللي بدأت حاجات كتيرة جدا في اﻷول وبعد كده الناس بدأت تبني على تجربتها زي apt-rpm, urpmi, Yum


rpm كأداة أساسية في التثبيت كويسة جدا وكمان ليها استقرار عالي كمان ... ومقضية الغرض بس أكتر حاجة متعبة معاها إنها مش ذكية بالقدر الكافي لدرجة إنها تعرف ايه البرنامج اللي مفروض ينزل قبل البرنامج اللي انت عايز تثبته وبعدين تعمل كده من غير متصدع دماغك

ﻷ هيه كل ما عليها تعمل كشف سريع على البرامج اللي مفروض تنزل قبل وبعدين تطلعلك رسايل بيهم وهكذا ... عايز تنزل برنامج 1 الrpm يرد عليك مش هينفع تنزل واحد إلا لما تنزل صفر قبليه ومتبدأش عملية التنزيل

فتخيل لو حضرتك بتنزل مشروع برنامج كبير شويتين وطلع إن مستوى اﻷعتمادية بتاعة أربع ولا خمس مستويات ... المحصلة هتكون تثبيت كل مستوي وبعدين يقولك ثواني نزل ده اﻷول وهكذا دواليك.. أظن حاجة مش لطيفة

بس خير محلولة يعني فيه مش أزمة ... فيه أدوات خاصة ببعض التوزيعات مقدمة حلول للمشاكل ديه ... مثال سوزي عندها Yast وذلك مثال على سبيل الحصر لا القصر ... يعني مش سر نووي لسوزي ولا حاجة ... أكيد يعني التوزيعة بتاعتك فيها حاجة قريبة من كده ... واضح يعني إني احنا بنتكلم في اﻷساسيات

دلوقتي بقى مش ناقص غير إني احنا نتعلم ازاي نستخدم الrpm ... واعتقد إني دماغك صدعت من كتر الكلام ده ..