جاري التحميل

Clear

1

2

3

4

5

6

7

تقييم كلي: 6.8 (أصوات:4)

أول نظرة بينك وبين اللينكس ...أول لقاء ....أول ابتسامة
عامة وفي اﻷغلب هي مبتكنش ابتسامة على اﻷرجح وبتكون تكشيرة جامدة قوي مع مواقف غير متوقعة ومفاجئة
لكن ده كان زمان شويتين ...دلوقتي تجربة تثبيت اللينكس أصبحت أكثر سهولة بمراحل .... وأصبحت أبسط من اﻷول بكتيير
بس ده بيعتمد عليك في اﻷرجح ...فبشوية تركيز وحبة معلمة هتوصل للي انت عايزه ... أما من غير تخطيط أو اقلب واقلب ودوس أوكيه أوكيه ... أعتقد إني انت اللي هتشيل
انت قدامك خيارات كتيرة...لكن منعا للتوهان وتجنبا للسرحان أنا هركز على تلات خيارات :
1-تنزل اسطوانة حية LiveCD وتتعرف منها على عالم جنو/لينكس وتشوف واجهة الإستخدام KDE أو GNOME ومن غير متكون لمست الهارد بتاعك أو نزلت عليه أي حاجة....بس إذا تكرمت محتاجين رامات-265 فيما فوق--
2-تثبت اللينكس على الهارد بتاعك اﻷساسي وبكدة يبقى عندك نظامين لينكس والويندوز
3-تثبت اللينكس على هارد تاني عندك إنت بتستخدمه في النقل ...وبكده حتى لو غلطت مش هيبقى فيه
أدني خسارة ...ده غير إني انت بيبقى عندك مساحة أكتر للتجربة
هنركز دلوقتي على الخيار الثاني ﻷنه اﻷكثر واقعية وهو اللي هيعرفك يعني ايه لينكس بحق وحقيقي...والخيار الثالث مش هيختلف كتير عنه ...أما الخيار اﻷول فده أبسطهم ومش محتاج غير إني انت تكون بتعرف تفتح السي دي روم :)
-تثبت اللينكس على الهارد بتاعك اﻷساسي وبكده يبقى عندك نظامين لينكس والويندوز
هنثبت اللينكس في وجود الويندوز فيما يعرف باﻹقلاع الثنائي Dual Boot
عشان تستب اللينكس مستريح عايزين على اﻷقل 5 جيجا -منصحكش بدول-وعلى اﻷكثر على قد ما تقدر سيبوله يعني 10
أو 15 أو 20 جيجا كويس قوي وانت اللي هتستريح بعدين ...أنا سايب 15 جيجا للينكس ...خصوصا وإن انت دايما هتبقى
عايز تجرب برامج كتير قوي.
طبعا أنت دلوقتي قاعد على ويندوز اكس بي
1-هتسيب الويندوز زي ما هو على السي C Partition ....مش محتاجين منه حاجة...وواضح قوي إنه الويندوز من غير ال C بيعبط بما فيه الكفاية
2--هتيجي من عند آخر كام بارتيشين وتحاول تفضيهم تماما من أي حاجة إنت تكون محتاجة واللي مش محتاجه ينفع تسيبه مهو كده دكه هيتمسح وبعدين هتمسح البارتيشين نفسه....هتمسحه منين !
Start>>Run>>Type compmgmt.msc



تختار البارتيشن الي انت مش محتاجه وتعمله كليك يمين وتختار Delete وبكده يكون عندنا مساحة فاضية بمقدار اللي انت مسحته


ملحوظة:أوقات هتلاقى خيار Delete غير متاح وده بسبب حالات مختلفة:
1-اني انت تكون عايز تمسح بارتيشين النظام System or Boot Partition
2-اني انت تكون عايز تمسح بارتيشين ويكون خيار الذاكرة اﻷفتراضية مفعل
Virtual Memory(Paging/Swapping)is Enabled
وبالتالي لازم تخليه غير مفعل على البارتيشين ده .... وهتعمل كده منين!!!
Right-Click MyComputer>>Choose Properties>>GOTO Advanced Tab>>Under Preformance Section >>choose Settings




Under Advanced Tab >>Under Virtual Memory >> Click "change"
and then Set for "no paging file"





مش ناقص دلوقتي غير ريستارت لطيفة كده وبعدين هتقدر تمسح البارتيشين وتخليه مساحة فاضية اللينكس يقدر يشوفه ويبني عليه علطول من غير متصدع دماغك بتفاصيل كتيرة
خلاص دلوقتي ممكن تتنفس الصعداء.....انت دلوقتي خلصت أصعب مرحلة في التثبيت.... ﻷن مرحلة تخصيص مساحة للينكس هي المرحلة اللي دايما بتضيع كل البيانات بتاعتك ...طبعا بسبب عدم تخطيطك ...لكن واضح عليك إني انت مستخدم تمام وماشي صح قوي Cool


آه فين اللينكس بقى !!! أنا مش شايف ايتها لينكس لغاية دلوقتي...
طبعا انت قريت حدوتة اللينكس وعرفت إن اللينكس ده مجرد نواة بتتعامل مع العتاد Hardware وتتعامل مع البرامج والتطبيقات Applications يعني مفروض تفهم كده إن اللينكس ده لابس طاقية الإخفى ومش ظاهرلك خالص ...
انت يا عم مدخلنيش في حوارات ملهاش معني أنا دلوقتي مسحت الهارد عشان تقولي طاقية الإخفى
يا سيدي أنا بحضرك لمرحلة محيرة من تثبيت اللينكس ألا وهي توزيعة جنو لينكس ؟
طب ايه معني كلمة توزيعة ديه!
كلمة توزريعة Distrobution تعني حزمة برامج مكونة من لينكس ومكتبة جنو البرمجية والتطبيقية .
طب ايه هو اللينكس وايه هيه مكتبة جنو البرمجية ديه....انت كده بتهزر .... أنت كده بتضطرني إني أقولك لازم تفهم الموصوع من بدايته أحسن لك ... تابع هذه المقالة ---ما هو اللينكس ؟
نرجع تاني ....دلوقتي بعد مفهت يعني ايه توزيعة ...لازم اصدمك بالحقيقة.... بالتعريف المذكور أعلاه ده يوجد آلاف التوزيعات والتي لا تختلف عن بعضها البعض في الكثير :
* فأي توزيعة منهم تحتوي على اللينكس كنواة ومكتبة جنو البرمجية كأدوات تستخدم لتنفيذ المهمات اﻷساسية المطلوبة من أي نظام تشغيل
*يتبقى هامش صغير للأختلاف وهو واجهة اﻷستخدام ...عدد التطبيقات الجاهزة...عدد التطيبقات القابلة للتنزيل...برنامج التثبت العام Setup Tool...تعديلات كل توزيعة لنواة لينكس ومكتبة جنو البرمجية....وهكذا
*بس في النهاية انت مفروض تستخدم كل التوزيعات ديه بنفس الطريقة واﻷسلوب بدون أي مشاكل أو تعقيدات
بعد لما مسحت الهارد ...جي تقولي آلاف التوزيعات!!!..
لو أعرف انت ليه مستعجل عليا كده كنت استريحت .....ياأخي بقولك كلهم حاجة واحدة وبيعتمدوا على أصل واحد ....
طيب دلوقتي اختار ما بينهم ازاي ....؟؟؟
لا ابدا ديه حرية شخصيةوانت حر تستخدم ما تراه مناسبا لك ...لكن طبعا كبداية انت لازم تستقر على حاجة وبعد كده تبدأ تجرب ومن غير كده الموضوع كله هيبقى توهان
وعلى فكرة التوزيعات ديه اسمها Linux Flavors ولو ترجمناها ترجمة حرفية تفول نكهات لينكس ....يعني فعلا الموضوع عبارة عن نكهة وذوق واختيار اﻷنسب ....إنه عالم المصادر المفتوحة....على الرغم من بناء جميع التوزيعات على نفس اﻷساس إلا انه وجد مجال للمنافسة والتنافس.
طب انا دلوقتي هنزل آني توزيعة ؟
عشان مفرضش عليك رأيي أنا هحاول أعرض عليك أهم التوزيعات العالمية ...اللي ممكن تختار ما بينها على مزاجك وعلى فكرة الفرق ما بينهم يكاد يكون صغير جدا ...بس أنا عن نفسي جربت توزيعات كتيرة وللأسف مش هقدر أشرح طريقة تثبتهم كلهم أنا إن شاء الله ناوي أشرح أسهل التوزيعات وبعد كده هقولك على وصلات لتثبيت الباقي ....على الرغم إني انت لو فهمت العملية ...هتلاقي إني الموضوع يكاد يكون متطابق في جميع التوزيعات ...العملية في المقام اﻷول ثقة مش أكتر ....طب ليه مش هتشرحهم كلهم أولا ﻷن زي مقولتلك العملية متطابقة إلي حد كبير ... ثانيا مفيش حد عنده طاقة ووقت لانهائيان ... كل حاجة في الكون ده محدودة
وعامة فيه موقع DistroWatch يحتوي على قاعدة بيانات كاملة بكل التوزيعات ومزاياها وعيوبها وسنوات تطويرها ومعلومات تانية كتيرة جدا هتفيدك...وفيه ترتيبات للتوزيعات على حسب الشعبية ومجتمع المطورين و.. و......كفاية وصف ...روح تصفحه أحسن لك
هنبدأ دلوقتي بعرض أهم التوزيعات وأشهرها مع وصف سريع ﻷهم خصائصها وعليك أن تختار اﻷفضل واﻷنسب ﻷستخدامك
Redhat Distribution



أغلب الناس اللي سمعوا عن اللينكس بيكونوا عارفين التوزيعة ديه كويس ...ده غير انهم بيكونوا فاكرنها هي التمثيل المطلق للينكس ويقعدوا يبنوا أرائهم وتجاربهم بناء على انهم استخدموها...سيبك من الموضوع ده دلوقتي
وهي من أشهر شركات توزيعات اللينكس ...وهي شركة أمريكية في اﻷساس... وشهرتها جعلت منها توزيعة قياسية ينبني عليها أغلب مفاهيم التوزيعات
والمشروع المفتوح الخاص بيها اللي كل المطورين والمستخدمين بيتعاملوا معاها هو Fedora Project ... طب فين الريدهات في الموضوع
أولا: الريدهات دلوقتي بقت مخصصة كل أعمالها في اتجاة اﻷعمال والخوادم Business and Enterprise Editions
ثانيا:بس ده ميخلكش تفتكر إن مشروع فيدورا ده لقيط ولا حاجة ..ﻷ هو تحت الدعم الكامل لشركة ريدهات ومرخص تحت رخصة جنو العامة وليه مجتمع مطورين أكتر من ممتاز
فيدورا هتفيدني بأيه:
1-تثبيتها سهل وبسيط ومن غير تعقيدات
2-أغلب مصطلحات التوزيعات واﻷفكار اﻷساسية هتاخد بالك منها مع فيدورا ﻷنها توزيعة أكتر من مشهورة
3-تعتمد واجهة GNOME كواجهة أساسية
هتصدعني امتى:
1-لما تكون عايز واجهة استخدام أكثر من خيالية
2-لما تعوز تشوف NTFS Partitions اللي انت عملتهم على الويندوز
3-لما تبقى عايز حاجات كتيرة جدا هيه في نظرك بديهية ولكن مع فيدورا تحتاج أكثر من برنامج لتنفيذها ... مثال واحد MP3 Files
4-دعم متوسط للغة العربية

OpenSuSE Distribution




نفس موال الريدهات ...النسخة اﻷساسية الموجهة للأعمال اسمها SuSE سوزي بس على خلاف الريدهات هما مهتمين برده بسوق المستخدمين Desktop Editions وده يمنح مشروعهم المفتوح بعد مختلف نوعا ما...بمعنى آخر إن مشاكل الريدهات مع MP3 و ال NTFS هي مشاكل قانونية مش أكتر ... وده محلول نوعا ما مع سوزي يعني هتشوف هاردك كله من غير برامج اضافية وباضافات بسيطة أو من غير اضافات هتشغل ملفات RM وال MP3
سوزي هتعجبك امتى :
1-التثبيت سهل ومباشر واغلبه اوتوماتيك وخيارات معرفة مسبقة
2-تعتمد واجهة KDE كخيار اساسي للتصفح
3-بتحاول تخليك تصرف أكنك قاعد على الويندوز وده بيزيل احساسك بالغربة شوية
سوزي هتصدعك امتى:
1-اغلب التثبيتات التلقائية اللي انت كنت فرحان بيها ... هتتمني تغييرها ولكن في حالات متقدمة شويتين
2-دعم جيد للغة العربية
3-عايز تكتب حاجة على الNTFS مش هتقدر...ومحتاج تثبت برنامجين

Mandriva Distrobution




توزيعة جميلة جدا ومبسطة وقوية في نفس الوقت... ودعم اللغة العربية أكثر من متميز وعامة في ناس كتير عرب بيستخدموها يعني زي متقول كده مشهورة عربيا ... ومعنديش كلام كتير دلوقتي أقوله عليها ...لكن ببساطة هي توزيعة ممتازة ومرشحة بقوة


Ubuntu


التوزيعة القادمة والمكتسحة بقوة نظرا للدعم العالي لمستخدم التوزيعة كسطح مكتب "ترجمة سطحية شويتين"بس المقصود مستخدم الكومبيوتر النهائي اللي ميهموش تفاصيل كتيرة جدا ولا عايز يصدع دماغه بالتفاصيل الصغيرة جدا ....