تثبيت سوزي 10.2
مش ناقص دلوقتي غير إني انت تحمل توزيعة من توزيعات جنو/لينكس ....واحنا هنا ان شاء الله هنحمل سوزي لينكس OpenSuSE 10.2 وبتحتاج على اﻷقل 5 جيجا فيما فوق ....
طبعا انت خلصت المطلوب منك في مقالة جاري التحميل والحمد لله ... و
ملحوظة:من اﻷفضل ألا يكون كل الهارد بتاعك NTFS يعني لازم على اﻷقل يبقى فيه جزء FAT32 عشان تقدر تستعمله من على النظامين الويندوز واللينكس-عامة سوزي بتشوف الNTFS لوحديها من غير أي برامج اضافية ولكن عشان تكتب عليها محتاج حبة برامج انت في غني عن تفاصيلها دلوقتي.
لتحميل هذه النسخة ما عليك إلا اﻷنتظار فانت اﻵن سوف تحمل كذا جيجا ...وان كان أحد أصحابك عنده النسخة ده يبقى ربنا بيحبك وتكون وفرت وقت و مساحة واسطوانات ... أما إذا كان مفيش فمقدامكش إلا اني انت تركب الصعب
-موقع التحميل Opensuse.org وهتلاقي هناك ملفات أيزو جاهزة للتحميل ...خمس ملفات على خمس اسطوانات...وطبعا بيتحرقوا ايزو مش زي البيانات العادية بتاعتك
-دلوقتي المساحة اللي فضيتها من الهارد جاهزة
-عدلت البيوز BIOS Setup (شاشة Del or F2 على حسب نوع الماذربورد بتاعتك)بحيث إن السي دي روم هو ال First Boot Device
1-دخلت اسطوانة رقم واحد وظهرتلك الشاشة دية
2-طبعا واضح إن في خيارات كتيرة جدا ...لكن مفروض أول خيار ...هيقوم الجهاز عادي...كأن شئ لم يحدث ... والخيار التاني هو المطلوب هو اللي يبدأ عملية التثبيت ... وبعدين هتختار اللغة ... اللغة اﻷساسية طبعا انجليزي....
3-وطبعا لازم توافق على رخصة برنامج بينزل مجانا من على الانترنت.... قولي مش هتوافق بقى !!
4-وبعدين هنختار تثبيت كامل "New Installtion"...طبعا انت مخترتش حاجة ........ دوس نكست يا عم احنا هنضحك على بعض ;)
5-طبعا أي جهاز كومبيوتر مينفعش يشتغل من غير ما يعرف الوقت ... حدد مكانك على الكرة اﻷرضية واختار بلدك وظبط الوقت
6-دلوقتي هنختار الواجهة الرسومية - ترجمة عليلة - GUI بتاعتك ودية المسئولة عن منظر سطح المكتب بتاعك احنا هنا هنختارKDE
طب يعني ايه KDE:
يعني واجهة لطيفة جدا والوان اكثر من رائعة
يعني تنظيم برامج ومجلدات وملفات بطريقة جميلة جدا
يعني واجهة تخليك تعمل حاجات كتيرة جدا بدون اضافات ...تشغل PDF Files تشغل فيديو تشغل صور هتلاقيه هي اللي بتقوم بالمهمة
وطبعا كله بحسابه عايزين رامات عالية شويتين يعني 512 كويس كحد أدني والمعالج عايزينه فوق الواحد جيجا هيرتز وكارت الشاشة على اﻷقل 64MB RAM واخد بالك كل القيم دية حد أدني ...يلا بقى استحمل...بس ممكن اطمنك أنا اعرف ناس كتير شغال على قيم أقل من دية ومقضيها زي الفل ...يعني جرب مش هتخسر حاجة ...
وده منظر الKDE
منفعشي روح للGNOME
ويعني ايه GNOME:
يعني واجهة حلوة شويتين
يعني سرعة ورامات أقل ومعالج وكارت شاشة أقل
وهكذا ومتفتكرش إن GNOME دية قلة ولا حاجة ﻷ ...دية ليها Themes كتيرة بس القضية كلها إنها مصممة بحيث تضمنلك سرعة معينة بكومبيوتر امكانياته متوسطة....وده منظر الGNOME
7-نرجع تاني لتثبيت السوزي ...دلوقتي سوزي شايفة إن ديه أنسب تعريفات لجهازك ...حاجة كده اوتوماتيك ...لو انت فاهم وشايف إن في اعدا د معين مش مناسب غيره طالما انت فاهم بتعمل ايه...
عالعموم خلاصة الاعدادات ديه هيه تقسيم المساحة الفاضية اللي عملناها من الويندوز إلي تلاتة اجزاء بارتيشين Partitions
/root
/swap
/home
اﻷول اللي هو الرووت root ,ده اﻷساس وعليها أغلب ملفات النظام
التاني هو السواب swap وده مكان الVirtual Memory بتاعة الويندوز وعامة بيبقى ضعف الرامات بتاعتك فلو عندك 256 هو هيبقى 512
والتالت هو الهوم Home وده مكان خاص بملفاتك وجميع ملفات المستخدمين اللي هيستخدموا النظام
والتقسيمة ديه هي اﻷكثر شيوعا ...لكن في الأجهزة اللي بيتثبت عليها لينكس عشان يشتغل بجد بيكون فيه تقسيمات اضافية لكل تقارير النظام/var ولكل برامج المستخدمين/usr ولكل ولكل وهكذا
وبعدين عندك بيان بجميع البرامج التي سيتم تثبيتها وامكانية حذف او اضافة ما تشاء من الحزم البرمجية وبعدين اعدادات اللغة .
8-بمجرد ما ضغطت التالي هتلاقى نفسك بدوس على كذا ترخيص وا تفاقية خاصة بالبرامج اللي انت هتثبتها وبعد كده تأكيد ببداية عملية التثبيت
9-دلوقتي لو انت معدلتش ولا حاجة ولا زودت تثبيت حزمة أو ضفت أي تعديل على التثبيت المفترض لجهازك مفروض تستنى ساعة وبعدين هتلاقى السوزي خلصت تثبيت و يمكن أقل من ساعة كمان يعني بتعتمد على عوامل مختلفة ... المهم إني انت كده كده كنت مخصص وقت زيادة شويتين لعملية التثبيت دية
خلاص سيب عملية التثبيت تاخد الوقت اللي هتاخده ...و لو انت مش قدام الجهاز يبقى احسن عشان دلوقتي الجهاز هيعمل اعادة تشغيل ويقوم نفسه من البداية طبعا مفروض هو لوحده هيختار الاختيار اﻷول من قائمة السى الدي وبعدين هيدخل على قائمة جديدة زرقة كده عمرك مشفتها هتلاقى فيها امكانية تحميل الويندوز والسوزي وخيار اضافي لتحميل الجهاز من القرص المرن Floppy Disk وبرده هو لوحده هيحمل سوزي تاني ... وبعدين نكمل عملية التثبيت ...
10-الشاشة دية بتطلب منك كلمة السر للمستخدم المطلق للجهاز ... المستخدم ده اسمه root وهو يقدر يعمل كل حاجة وأي حاجة يعني معاه صلاحيات مطلقة تسمحله يمسح ملفات اللينكس نفسها..
ملحوظة : اللينكس مبحميش نفسه منك على عكس الويندوز لو لقى حاجة مش عاجباها ببساطة مبيخليكش تقدر تعملها ...لكن اللينكس بيحجز حقك في استخدامك المطلق للبرامج اللي موجودة على جهازك وده عيب وميزة في نفس الوقت
يعني مثلا الويندوز مش هيسيبك تعمل فورمات للسي وهو شغال
#DOS-Style Formatting (Windows Box)
c:\>Format C
#remove command at bash shell (Linux box)
linux-box@local:~#rm -rf /
بس على العكس اللينكس ممكن يسيبك تمسح كل نظام الملفات بأمر واحد فقط ويمكن من غير تأكيد كمان
rm -rf /
وبالتالي محدش يقدر ينصحك ويقولك استخدم الحساب ده في استخدامك اليومي ...لازم يبقالك مستخدم عادي بصلاحيات معقولة شوية تستخدمه في استخدامك العادي ومتخافش هنعدي على المرحلة دية في خلال عملية التثبيت ...هو المهم هنا إني الواحد كان يسجل الملاحظة ديه
11-الشاشة دية طالبة منك اسم الكومبيوتر واسم الدومين -- النطاق-- والصفحة اللي بعديها هتبدأ تعرف كارت الشبكة والشبكة واﻷنترنت ...لو انت شغال على الDSL هتستريح قوي ...أما لو عايز تشتغل على المودم يبقى هيتوقف على نوع المودم بتاعك وهل هو مدعوم على اللينكس ولا ﻷ....الاعدادات ديه لو سابتها زي ما هي مفيش مشاكل...
أما لو انت فاهم وعايز تغير اتفضل غير ...يعني لو عايز الIP يبقى ثابت Static مش Dynamic
(Assigned by DHCP Sever)
يلا دخل البيانات اللي خاصة بالشبكة بتاعتك وعرفها صح Cool
12-عايز دلوقتي يكشف على الإتصال بتاعك ويتأكد منه ...بس ديه حاجة مش ضرورية قوي واﻷفضل تختار الخيار الثان عشان أوقات كتيرةالخيار اﻷول مبيتمش صح ...وعالعموم جرب لو اﻷختبار فشل اعمل BACK واختار الخيار الثاني ...الموضوع بسيط متعقداهاش
13-دلوقتي سوزي هيروح لموقعOpenSuSe وعايز يجيب آخر التحديثات ...مرحلة انصحك متنفضهاش وتحاول تخلصها لكن لو انت مش عالنت دلوقتي أو هو متعرفش صح ....مقدامكش غير اني انت تعدي المرحلة دية Yell
14-طريقة تعرف النظام على المستخدمين ...هي ترجمة مش صح قوي بس ...بس ميهمكش دلوقتي سيب الخيار اﻷولاني زي ما هو
15-هي دية المرحلة اللي كلمتك عليها في خطوة تعريف كلمة السر للرووت root دلوقتي تقدر تعرف مستخدم عادي ليك تستخدمه في تعاملك اليومي مع الجهاز...من اﻷفضل عدم تفعيل خانة الدخول التلقائي Automatic Login وده معناه ان كل مرة سوزي هتشتغل هتدخل على الحساب بتاعك علطول من غير كلمة سر ولا ديالوه وده مش لطيف خصوصا لو كان الجهاز مش بتاعك لوحدك
16-بعض المعلومات عن اصدار التوزيعة سوزي 10.2 OpenSuSE
تهنئة حارة من صميم قلبي ...انت اﻵن حر ...وتستخدم برامج حرة ....مبروك على هذه الخطوة الموفقة بإذن الله
اﻵن عالم اللينكس وعالم جنو بين يديك من خلال توزيعة سوزي .
حاول أن تستكشف هذا العالم ...متحاولش تتخنق بسرعة بدل ميجيلك يوم هتلاقي نفسك مضطر تستخدم لينكس .... حاول تستثمر وقتك مع لينكس وجاول تسأل على قد ما تقدر
مش عيب إني انت مش عارف لكن العيب إني انت تفضل مش عارف
- مدونة قاسم
- قراءة(2351)
استفسااااار
جزاكم الله خيرا أخي الحبيب
بارك الله فيك
أنا جبت نسخة سوزي 9.3 الخمس اسطوانات وصطبتها بالفعل الحمد لله
بس اللي حصل أن كان فيهحاجات في وسط التصطيب مش بأفهمها أوي فبأضطر أمشيها بالفهلوة
أو مثلا كنت ساعات أقوم من على الكمبيوتر وأرجع ألاقيه واقف في حتة معينة مش فاهم هو مستني مني إيه...فأجرب ((أحط الاسطوانة اليل بعدها، أعمل ريستارت، وهكذا أنا وحظي))
المهم هو اتصطب دلوقتي والحمد لله
هل أحسن لي أشيله وأصطبه تاني من الأول علشان أشوف الخطوات كلها صح، ولا خلاص كده كويس وأكمل تعليم بقى ؟؟
آه ومعلهش سؤال تاني
أنا الحمد لله نزلت سوزي 10.2 ..هل أصطبها بدل 9.3 ولا مش فارقة كتير ؟؟؟
جزاكم الله خيرا
طبعا 10.2
وتاني ميزة للموضوع هو حبة ثقة ... هتلاقى طبعا تاني مرة في تنزيل التوزيعة بتاخد بالك من حاجات مكنتش واخد بالك منها أول مرة ... وبتزداد خبرة وثقة ... ويمكن تقابلك مشاكل وتحلها فتتعلم اكتر
ومن ناحية الفهلوة ... انا بحييك عليها ﻷنه انا قابلت ناس كتير بتقولى فين قايمة ابدأ في اللينكس ... هو آه مفروض نستفسر بس مش لدرجة المستوى ده ... لازم نتعب نفسينا شوية عشان نتعلم وطريق الفهلوة يعني المثابرة ... وده حاجة صحية جدا ...
اخيرا ادعي ربنا يقابلك مشاكل على قد ما تقدر وطبعا تحلها ... مش نقعد نتفرج عليها ... وبالتوفيق أخي أحمد
السلام علكيم هل
يمكن
ولمزيد من التفاصيل عن كيفية التعريب يمكن المتابعة من هنا