أنا عجبني اللينكس
يارايح أرض الأحلام ...وصلني معاك الله يخليك..ترا ترا..
طبعا إنت بدأت تتعود معايا على الصدق واﻷمانة والشرف وكل المعاني الأمورة ديه...صح !
وتعقيبا على ذلك ...وتحريا للشفافية وامعانا في التقصي أقول اﻵتي :
---------------------------------------------------------------------------------------------
1-خليك دايما فاكر إن اللينكس مش أرض اﻷحلام ولا حاجة ...دايما هتلاقي نفسك بتضحي بحاجة مقابل حاجة
2-لازم تحدد شوية انت محتاج لينكس ليه... على فكرة ممكن يكفيك إني انت عايز تجرب...ناس كتيرة كانوا زيك وبعد كده مقدروش ينسوه
3-اذا كان استخدامك لجهازك يقتصر على اﻷلعاب واﻷفلام واﻷغاني.... فلا أنصحك باستخدام لينكس
عشان مش معقولة انت هتقعد تذاكر نظام تشغيل عشان أغنية, معايا ولا ايه!!!
استطراق جانبي
بس برده متنساش إني ويندوز الرصيف مش هيفضل علطول ...وعلى الرغم إني مبحبش موال بروتوكولات صهيون إلا إن الموضوع قريب من كده...فالهدف هو اغراق المجتمع بالويندوز بدرجة تجعل اﻷستغناء عنه شئ صعب جدا....وهو ده اﻷجابة على السؤال اللي كان دايما محيرك...معقولة ميكروسوفت بجلالة قدرها مش قادرة تمنع حد من إنه ينسخ اسطواناتها ويوزعها على اصحابه ...أصحابه ايه...ده بتتوزع على قارات مش أصحابه....وطبعا أصحابه دول لما هيكبروا ويستوظفوا هيبقى الشهادات المعتمدة اللي من ميكروسوفت هتبقى بيتسأل عليها قبل كليتك ودراستك...ناهيك عن إني الكلية بتاعتك غير مصنفة عالميا بأي بطاطا... بس برده حاجة تحرق شوية أمال أبويا كان قاعد بيصرف عليا ليه عشان في اﻵخر أروح اشتغل يقولي انت معاك سيرتيفيكيشن ايه Cirtificate ....بص أنا هنا بقى مش بصدد الخطب الرنانة والكلمات العصماء التي بتغرقنا عندما يحدث أي حدث جلل ونعيش في الحلم وتلاقي نفسك في اﻵخر مش قادر تخلق واقع تقدر تعمل فيه حاجة .. أنا هنا بصدد تجربة حية ونموذج قادر على التعايش...عايز تعمل حاجة اتفضل ذاكر لينكس وشوف الناس أصبحت مستقلة ازاي من براثن شركة من حقها إني ميهمهاش غير مصلحتها ...المهم انت دورت على مصلحتك ... اعتقد إني ديه خلاصة الحدوتةUndecided
بمعنى أوضح انت ليه مسألتش نفسك بعد مقالات حدوتة اللينكس ازاي الويندوز معاصر كل ده وقدر يجاري ويكتسح سوق الديسكتوب
ملحوظة : عامة سوق أنظمة التشغيل متعدد اﻷطياف شويتين بس أهم طيفين فيه هما اﻷجهزة الشخصية Desktop PC وأجهزة الخوادم Servers....النوع اﻷولاني هو اللي انت قاعد عليه دلوقتي ...والنوع التاني هو الخادم اللي مشغل الموقع اللي انت بتصفحه برده دلوقتي
ده ﻷني الويندوز بيعتمد على نظرية مهمة جدا --- نظرية المستخدم اﻷولة ---
واﻷولة كما نعرف هي اناء يوضع فيه المياه لتترك في التراوة ويقول أولة اسم علم والمصدر برده أولة وغير قابلة للإشتقاق....وعندما ننعت شخص باﻷولة فالمقصود التهكم والسخرية مع عدم التحقير ...ازاي متسألينش !!!
تنص هذه النظرية على أن نظام التشغيل يجب أن يتوفر به واجهة استخدام لا تستلزم أي تفكير أو أي مجهود ذهني ...وبالتالي يكون قابل للتعلم على أيدي شرائح كثيرة جدا ليست بالضروروة على أي خلفية معرفية بعالم الحاسبات .... وبيني وبينك هو ده اللي مطلوب .... فأيتها أولة .... آسف .... فأي مستخدم يمكنه اﻷمساك بالفأر قصدي الماوس و يفعص الزراير وهو مشاور على أي حاجة واديه بيجرب ايه اللي هيحصل يعني ده حتى ممكن يشغل أحسن فيلم ولا أغنية كان نفسه يتفرج عليه أو يسمعها .... وعلى فكرة نظرية النوافذ والماوس مش اللي عملتهم ميكروسوفت ... بس المهم هيه عرفت تسوقهم صح ...وبالتالي اكتسحت كل الحواسب الشخصية وفي خلال الفترة ديه كان عالم لينكس مش همه غير سوق الخوادم Servers ولغاية فترة قريبة كان لينكس والشركات اللي شغالة بيه مش هاممها إلا السوق ده....طبعا دلوقتي الوضع اختلف والدنيا اتقلبت لدرجة إنه لينكس في سوق الحواسب الشخصية بقى منافس خطير جدا ﻷ وبديل يعتمد عليه ... يلا يا سيدي فسحة...اتفرج على الفيديو ده.
بص فيه سوء فهم خطير جدا يساء معالجته عند تحليل نظرية اﻷولة .... بمعنى إني لما والدك ولا والدي يقدروا يتغلبوا على الفارق التكنولوجي بسبب الحد الزمني الفاصل ما بين جيلنا وجيلهم ويقدر يستخدم الكومبيوتر ويبقى ليه وقت محدد يوميا يقعد عليه ...يبقى يندرج وصفه تحت أولة...آسف إني أقول إني أبقى منحط ومعنديش دم لو هو ده كان تحليل النظرية ...
طبعا ﻷ .... اﻷولة اللي بحق وحقيقي اللي اقتنع أنه بيعرف يشغل ويندوز وانه قفل النظام وخلاص بقى هاكر مخترق وواحد حليوة كل الناس بتسأله....معمركش حصرت أجوبة الهاكر المزعوم ده...أنا عارف انت محصرتهاش...بس انا هقولك هو معندوش غير كام جواب كده كل لما بسمعهم بستحقر نفسي !
*الجهاز عمل كذا كذا ...وبعدين لما جيت اعملوا راح عملي----
الهاكر الحليوة يرد: هو عمل كده أساسي لازم تستب ويندوز
أنا أعرف ناس ممكن يعيدوا تستيب الويندوز لو فيه موقع مفتحش معاهم
*انها الفوضي الخلاقة...الجهاز محطش منطق مش عايز يفتح أصلا....
الهاكر الكبير قوي يرد قائلا :خلاص فك كام كارت وركبهم تاني ولا أقولك ابعد عنه وبعدين قرب...منفعش حاول تسيبه كذا يوم يمكن ربنا يهديه...
بنفس المنطق ده تكون أجوبة هذا الهاكر الحليوة واﻷعجب من ذلك أنك لا تملك حيلة إلا أن تصدقه ... وما ليس لك به قدرة على أن تتعجب أصلا أن بعض هذه اﻷساليب والطرائق تكون فعلا هي الحل ..... لا إله إلا الله... انها التكنوملوخية
طبعا أعرف أنك قد رأيت هذا بل وقد تكون رأيت ما هو أعجب من هذا والذي أتمنى أن تشاركنا به ... ولكن إن دل هذا فإنما يدل على أنك تستخدم صندوق أسود لا تملك معه حيله إلا الفهلوة ...فأنت دائما ما تقنع نفسك أنك تفهم هذا الشئ ولكنك في حقيقة اﻷمر لا تفهمه...انما الواقع انك رأيت من هو أقل منك خبرة فأعتقدت أنك تمتلك خبرة ... دائما ما يقال أنت دائما طويل بين مجموعة من اﻷقزام ...اﻷعور ملك على مملكة العميان .
بص عشان محدش يلعب في دماغك بنظرية اﻷولة ديه ... أنا هشرحلك مثال تطبيقى على النظرية ديه ...فاكر أول لما جبت الجهاز فاكر لما كنت بتترعب من مروحة الباور وتدخل الحمام لو فتحت السي دي روم ...فاكر ولا أفكرك ...بس برده أنت معلم كبير قوي وانا أصلا مقتنع بيك بس انت مسكتش وفعلا يوم ورا يوم بدأت تتعود على الويندوز لأ وبقيت تعرف كروت ﻷ وبقيت تستب برامج ﻷ وبقيت تفك مفاتيح برامج يا معلم .. ﻷ وبقيت تفتح النت ﻷ وبقيت تستخدم الأوفيس وبقيت وبقيت وبقيت تستب ويندوز ياااااااااااااه ايه الحلاوة ديه بس ثواني..اللي حصل ده ملوش غير معنى واحد ...هو إني انت يجي منك ويجي منك قوي....... بس ثواني صبرك عليا شوية .... بتيجي لحظة وتلاقي دماغك اتشبعت ويبقى الويندوز كله مفهوش حاجة تتعمل تاني غير طبعا لو دخلت في موال الCirtificate معناها ايه إني انت تاخد شهادة باسم الشركة تلاقى حاجات عمرك مكنت تتصورها ...ملهاش غير معني واحد هما إنهم محتكروش الويندوز بس ... ده كمان احتكروا التكنولوجيا....وبالتالي هم اليد العليا وانت اليد السفلى ... طبعا ده إذا كان اللي انت اتعلمته من شهادتهم ده هيخليك تعمل نظام تشغيل لا سمح الله...وبالتالي تلاقى ان حتى السوق أصبح محكوم فأي فني بيقول على نفسه فني هيعمل ايه يعني ...يستب ويندوز...يشيل فيروسات بمعنى أدق هو بيشيل الويندوز كله بعد لما بيوهمك إنه أنقذ الجهاز من اﻷنفجار وانه ضحى بالجنين عشان اﻷم وحوارات فاضية ...الواحد ضغطه بيعلى لما بيفتكرها %$#
نرجع تاني للموضوع ...القصة كلها في أبسط تحليلاتها بتقول إني في شركة عملاقة جدا عايزة تحتكر كل حاجة بحيث تظل لها الغلبة ... وعلى النقيض تماما فيه وسط تاني عايز يحافظ على الحقوق للمبرمج وللمستخدم ويمنح طيف أوسع من المجالات التي يمكن اقتحامها دون أي بوابات أو عقبات .... بمعني إن لما تكون البرامج كلها مفتوحة المصدر وناس كتيرة عارفة التكنولوجيا اللي شغالة بيها ... يبقى أنا كمستخدم أمامي أكتر من جهة أختار منها بدل من الشركة الوحيدة اللي هتتهمني إني أنا اللي أولة ومش عارف استخدم الجهاز وتقعد تقولك أقفله صح ومتفتحوش بسرعة و انت اللي جبتله فيروسات...ولما تحن عليك وتكتشف إني فعلا كان فيه مصايب في الويندوز بتاعهم تروع منزلالك - بعد الهنا بسنة طبعا- تصليحات وتزويدات تقعد ترقع النظام المخرم بتاعهم ده .
نقطة مهمة أساسية لازم نتضمنها في المقالة ديه...هيه إني انت لو عاصرت الويندوز كتير وبدأت تقرب من اللينكس هتلاقى إني دماغك وتفكيرك كله كان سطحي في الويندوز بدرجة لا تسمح لك بالتعامل والتفاعل الطبيعي مع اللينكس و السبب فيه كده كان الويندوز طبعا ...خليك فاكر دايما انت مش زي أي حد بيستخدم الكومبيوتر إنت اللي كنت نفسك تبقى مقفل الكومبيوتر وفاهم فيه كل حاجة وعارف مداخله ومخارجه وبتستخدمه بالطريقة اللي تريحك وتعمل اللي انت عايزه..... على فكرة انا مبكلمش على باشمهندس ده بالعكس ده اللي بتبقى دماغه كده ده واحد في كلية أو معهد ملهومش علاقة بالكومبيوتر أصلا أو حتى الدراسات العملية...
ممكن تعجبك المقالة دية وممكن تتخنق منها ...بس المهم إني انت تقنع نفسك في الحالتين عجبتك ليه ولا اتخنقت منها ليه....مش مطلوب منك أكتر من كده ولا أنا هاخد فلوس على كل جهاز هيتستب عليه لينكس-- ده الموضوع كله قيم ومفاهيم ورؤى وبعدين على رأي الهاكر الكبير ايريك ريموند ...بيقول ... مفيش وقت تكره ويندوز .... وانا بقولك إن الموضوع لا ويندوز ولا لينكس ...الموضوع كله اتجاه متحرر نحو ثورة المصادر المفتوحة أو ثروة المصادر المغلقة.
في الختام أجد هذه المقالات للأستاذ جمال غيطاس بمجلة لغة العصر بعنوان "المصادر المفتوحة منهج للتنمية وليست صراع منتجات " على أعداد المحلة لعام 2004لشهر 8 ... حاول تدور عليهم لو انت متابع للمجلة أو ممكن تلاقيهم على موقع أرشيف موقع اﻷهرام ... بداية جيدة لفهم ثورة المصادر المفتوحة عن كثب.....
وسنبدأ بإذن الله في المقالات القادمة نقترب من اللينكس أكثر فأكثر .... وهننستبه على الجهاز وهنحاول نقحمه في استخدامنا اليومي للكومبيوتر ...يعني هنحاول مؤقتا نبعد عن النظريات والتعليقات وندخل عالم اللينكس الحقيقي....
- مدونة قاسم
- قراءة(711)
ممتاااااااااااز
جزاك الله خيرا عنا
استمر حفظك ربي
علِّق