ماذا تفعل ؟

السلام عليكم ورحمة الله وبركاته
جزاكم الله خيرا أخي قاسم

في الحقيقة أنا ماكنتش أعرف أصلا أن المفروض أشارك بتجاربي وكده..
أنا كنت فاكر أني أقرأ وخلاص..

لكن أكيد دلوقتي أحسن بكتير بإذن الله
فإن شاء الله كل ما يقابلني مشكلة هأقول لكم وأنتم أحرار أنتم اللي جبتوه لنفسكم..

وهأبدأ حالا إن شاء الله في قسم "مساعدة"


جزاك الله خيرا أخي وما تقلقش والله لا مجهودك ولا مجهودنا هيضيع أبدا من غير فايدة...

أنا متفق معاك جدا و أؤيدك وكان في دماغي فعلا اني احاول اعمل بلوج أو صفحة ويكي يتناول لينوكس بشكل عام و بعد كده التخصص في توزيعة معينة و ده طبعا باللغة العربية بس الفكرة عشان الواحد يكتب موضوع متمكن لازم يكون قرأه من كذا مصدر و من كذا جانب عشان يقدر حدد ايه المطلوب و ايه المشاكل الي ممكن يواجها و يكتب رأيه و ميقتصرش على مجرد النقل او الترجمة فقط..

الحقيقة مش عارف أقول ايه في النقطة بتاعت التعاون دي
لكن أنا هحكي عن اللي أنا شوفته من خلال تجربتي مع البرامج مفتوحة المصدر عموما
دلوقتي أنا عضو في منتدى جملة! وده برنامج إدارة محتوى مفتوح المصدر
جملة! من الآخر برنامج رائع في عمل أي موقع بأي شكل بأي محتوى بأي برامج
برنامج جامد آخر حاجة زي ما بيقولوا
اللي أنا شايفه في المنتدى بتاع جملة! إن كان فيه زماااااااااان شروح وشغل من بعض الإخوة وخصوصا المشرفين جزاهم الله خيرا
لكن دلوقتي ولا شروح ولا شغل إلا ما ندر
وتلاقي كل واحد يدخل يسأل وما يلاقيش ولا إجابة
وتكون النتيجةإنه يسيب جملة! الراااائعة ويقوم رايح على نيوك اللي (لامؤاخذة أي كلام)
كل ده ليه؟
عشان مش لاقي الدعم العربي اللي هيلاقيه في نيوك أو غيره من المجلات التعبانة اللي اهتم بيها العرب
فأنا اللي بقدر أعمله دلوقتي إني بحاول أرد على اللي أقدر عليه من الأسئلة المطروحة في المتندى عسى المنتدى ينشط من جديد والعرب يقدروا قيمة جملة! بجد

أنا شايف والله أعلم إن المشكلة واقعة على عنصرين
1- المبتدئين
تلاقي المبتديء بيدخل يسأل في حاجات بديهية وطبعا الخبير مش فاضي يرد على تفاهة
على رأي واحد صاحبي لما يقول: ما ينفعش أعلمك ازاي تفتح قائمة ستارت في الويندوز
فالحقيقة فيه مجموعة من المبتدئين عاملين نفسهم عمي وعايزين واحد ياخدهم تاتا تاتا
والطبيعي إنهم ما بيلاقوش إجابة
وده بيوبخ صورة المنتدى لما تلاقي أسئلة بالهبل ومفيش ردود

2- المحترفين
والمشكلة معاهم في محورين
المحور الأول: إنه مش فاهم موضوع البرامج مفتوحة المصدر ومش فاهم مدى الاستفادة زي ما الأخ قاسم كدة شرح الموضوع
المحور التاني: إنه فاهم كويس لكنه مش لاقي البيئة الخصبة في المجتمعات العربية

يعني مثلا أقرب مثال
بكلم واحد مصمم محترف
بقول له أنا بعمل مواقع بجملة! وده نظام سهل وجميل وكدة
قعد يقوللي: يعني هي جملة! بتاعتك دي هي يعني اللي هتقلب الدنيا؟ يعني عايز المبرمجين دول كلهم يسيبوا اللي قعدوا يتعلموه طول السنين دي ويروحوا للي مش عارف اسمها ايه دي؟
اللي قدرت أرد عليه بيه إني قولتله إن المبرمجين دول يقدروا يضيفوا لجملة! طبعا مع استخدامها
الشاهد إن واحد زي ده ما عندوش وعي
وده شىء لاحظته في أكتر من واحد مهتم ببناء المواقع
زي ما قولت مفيش وعي من المستخدمين العرب وعايزين يفضلوا زي ما هما كدة محلك سر
وفي نفس الوقت الناس اللي عندها وعي معظمهم مش عايزين يشتغلوا ولا عايزين يتعلموا وعايزين ياخدوا كل حاجة على الجاهز

معلش أنا طولت عليكم في الكلام
الكلام صحيح ملخبط وكل حتة في ناحية بس هو ده اللي أقدر أقوله
والله الموفق
والسلام عليكم ورحمة الله وبركاته