نظام ملفات لينكس

Clear

1

2

3

4

5

6

7

أول تقييم هو أصدق تقييم ...

طبعا الجملة مشهورة جدا اللي بتقول

كل حاجة في لينكس عبارة عن ملف ولو ما كانتشش تبقى مهمة process

انا كنت عارف الجملة هتبقى ملهاش طعم بترجمة "مهمة" ديه ... لكن ما باليد حيلة
بس ثواني ...ايه مهمة دية ؟
انا استهال اني بترجم... يا سيدي قصدي برنامج شغال في الرامات
كل حاجة كل حاجة عبارة عن ملف ؟؟؟
مش قوي كده طبعا ... فيه انواع ملفات خاصة نوعا ما ... وخصوصيتها إني نواة اللينكس Kernel بتتعامل معاهم بشكل خاص ... زي ملفات Sockets and Named Pipes .. طبعا ممكن يترجمو بس هتبقى زادت قوي ... ملفات الجيب واﻷنابيب

امنع الضحك ... امنع الضحك !!!
طبعا احنا وصلنا لمشكلة مشهورة جدا ... وهي مشكلة التعريب ... لكن ده مش مكانها دلوقتي .. وبإذن الله هيبقى ليها مقالات كتيرة جدا ... لكن دلوقتي المطلوب منك تفكر في معضلة مهم جدا ... ألا وهي .. هل القصور في اللغة العربية ولا القصور في اللي بيكلمو عربي ... أظن كفاية عليك دية دلوقتي ...

نرجع تاني ,
ايه هي انواع الملفات غير المذكورين باﻷعلى ؟
عامة نظام ملفات اللينكس بيحتوى على
مجلدات Directories ... حاويات للملفات بجميع انواعها
ملفات عاديةRegular Files .. ملفات في صورتها الطبيعة ﻷما تحتوى على نص أو كود تنفيذي Executable binary ... شفرات ثنائية ... بس مش بتاعة الحلاقة
روابط Links ... زي ما تقول كده الShortcuts بتاعة الويندوز ... بس هي ببساطة مش Shortcuts
ملفات خاصة ... سنحاول التفصيل فيها أكثر واكثر فيما يلي

طب ازاي نعرف نوع الملف ؟
باﻷمر ls تقدر تعمل حاجات كتيرة جدا ... ومنها طعبا نوع الملف ... وفيه اﻷمر file ... بيفصل في تعريف النوع اكتر من ls طبعا

andalusy@linux-box:~$ ls -l

drwxrwxrwx  3 qasem users    4096  bin

drwxrwxrwx  2 qasem users    4096  Desktop

drwxrwxrwx  3 qasem users    4096  Documents

-rwxr-xr-x  7 qasem users    4096  eclipse.txt

lrwxr-xr-x  5 qasem users    4096  embd



andalusy@linux-box:~$ file new

new : ASCII text

الرمز المعني
- ملف عادي نصي أو تنفيذي
d مجلد
l رابط لملف آخر ... اختصار
c ملف خرج ودخل بالبت I/O Character File
b ملف خرج ودخل بأقسام من البايت -يعني كذا بايت- I/O Block File
s ملف خرج وخل لكن خاص بالشبكة TCP/IP Socket File
p ملف خرج وخل لكن خاص بالمهمات Named Pipe


ايوة الكلام ده كويس وخفيف ... بس مش بالنسبة لواحد مش متخيل ايه اللي حصل للهارد بعد لما اللينكس ده نزل ؟
طبعا اليونكس ابو اللينكس ... بمعنى إن نظام الملفات كله مستوحى من نظام ملفات اليونكس

بس انا مشفتش يونكس قبل كده ؟
يعني حد قال اني انت شفت ... صبرك بالله

المقصود إن نظام الملفات ده معمم وقياسي جدا لدرجة إن أوقات كتير هتبقى حافظ اماكن كتيرة ... زي ما انت عارف إن الProgram Files هي اللي بينزل عليها كل البرامج اللي انت بتثبتها على الجهاز ... وهكذا

يعني ايه Partition أصلا ؟
يعني جزء من الهارد بتاعك متقسم بفورمات معين .. وليه حدود معينة ...

طب محتاجينه في ايه؟
محتاجينه في حاجات كتيرة جدا ... منها تنظيمي - للحفاظ على مساحات مخصصة ﻷغراض معينة ... ومنها امني - محتاجين نظام صلاحيات معينة لكل جزء من الهارد ده مثلا ... وهكذا
وانت طبعا فاكر لما الويندوز كان بيقفل فجأة ﻷي سبب متخلف لما كان يرجع ويعمل سكان Scan ... كان بيعمل على الهارد كله ... ﻷ كان بيعمل على البارتيشين اللي انت شغال عليه بس .. فاكر
وطبعا اللينكس عنده تقنية journaled file system اللي بتحمي البيانات عند انقطاع التيار أو غلطات الهارد ... وطبعا التقنية ديه شغالة أفضل بكتير لما يكون الهارد متقسم كذا بارتيشين

طيب فين الPartiotions اللي عندي على الهارد ؟
امر df وامر fdisk -l مفيدين جدا في الموضوع ده

andalusy@linux-box:~$ df -h

Filesystem            Size  Used Avail Use% Mounted on

/dev/hdc7              16G  7.3G  7.3G  51% /

udev                  189M  116K  189M   1% /dev

/dev/hdc1              20G   15G  5.4G  73% /windows/C

/dev/hdc5              40G   39G  892M  98% /windows/D



andalusy@linux-box:/home/andalsuy$ su

Password:

andalusy@linux-box:~# fdisk -l

 Device Boot      Start         End      Blocks   Id  System

/dev/hdc1   *           1        2550    20482843+   7  HPFS/NTFS

/dev/hdc2            2551        9728    57657285    f  W95 Ext'd (LBA)

/dev/hdc5            2551        7649    40957686    c  W95 FAT32 (LBA)

/dev/hdc6            7650        7722      586341   82  Linux swap / Solaris

/dev/hdc7            7723        9728    16113163+  83  Linux

أظن عرفت إني داخل root من الشباك # مع اﻷمر fdisk ... شاطر

ايوة بس ازاي احول للروت root وانا شغال على سطر اﻷوامر ؟
باﻷمر su وبعدين تحط جنبه اسم المستخدم اللي انت عايزه ... طبعا مع الرووت مش مستاهلة .. ﻷنها مفهومة إني انت بتحاول تحصل على صلاحيات أكبر

هنبدأ دلوقتي نستكشف نظام الملفات واشهر المجلدات فيه واستخداماتها

andalusy@linux-box:~$ cd /

andalusy@linux-box:/$ ls -l

drwxr-xr-x   2 root  root  4096  bin

drwxr-xr-x   3 root  root  4096  boot

drwxr-xr-x  11 root  root  8140  dev

drwxr-xr-x  92 root  root 12288  etc

drwxr-xr-x   7 root  root  4096  home

drwxr-xr-x  12 root  root  4096 lib

drwx------   2 root  root 16384  lost+found

drwxr-xr-x   3 root  root  4096  media

drwxrwxr-x   6 qasem root  4096  mnt

drwxr-xr-x   5 root  root  4096  opt

dr-xr-xr-x  99 root  root     0 proc

drwx------  35 root  root  4096  root

drwxr-xr-x   3 root  root 12288  sbin

drwxr-xr-x   5 root  root  4096 srv

drwxr-xr-x  11 root  root     0  sys

drwxrwxrwt 164 root  root 20480  tmp

drwxr-xr-x  12 root  root  4096  usr

drwxr-xr-x  14 root  root  4096  var

drwxrwxrwx   4 root  root  4096 windows

المجلد اﻷستخدام
bin اﻷوامر اﻷساسية والمشتركة ما بين المستخدم المطلق وبقية
المستخدمين
boot هتلاقى البرامج اللي بتقوم الجاهز ومعاه الملف التنفيذي للنواة
vmlinuz ومجلد الGRUB Bootloader المسئول عن القايمة اللي
بتطهرهلك أول لما الجهاز بيقوم
dev هتلاقى هناك كل طرفيات الكومبيوتر بتاعك من أول الكروت للمخارج
السيريال ... وهكذا ... بتتتعامل كأنها ملفات بس من نوع خاص
etc المجلد ده كله ملفات خاصة بتعريفات النظام والتطبيقات اللي عليه ..
عاملة كده زي الControl Panel
home المجلد الخاص بجميع ملفات المستخدمين ... زي متقول كده البيت بيتك
وعامة المجلد ده بيبقى على اسم المستخدم يعني زي الويندوز بالظبط
lib هنا جميع المكتبات البرمجية الخاصة بالنواة وجميع تطبيقات النظام اللي
نازلة عليه ...
lost+found حاجة خاصة بنظام الملفت وبتستخدم في تسجيل أي بيانات عند حدوث
مشاكل طارئة في النظام ككل أو تطبيق معين
mnt المجلد المتفق عليه ﻷلحاق أي نظام ملفات بالنظام ... مثل السيدي روم
أو هارد آخر مثلا
opt يحتوي على أغلب التطبيقات المضافة إلى النظام ... فمثلا هتلاقى أغلب
تطبيقات الواجهة الرسومية موجودة هنا
proc نظام ملفات تخيلي بيعبر عن معلومات كتيرة جدا خاصة بالنواة .. يطول شرحه
root ملفات المستخدم المطلق كلها موجودة هنا ... بمعني أصح هو
ده مجلد الhome الخاص بيه
sbin جميع اﻷدوات واﻷوامر الخاصة بالمستخدم المطلق فقط
tmp جميع الملفات المؤقتة الخاصة بالنظام ملفات مؤقتة خاصة بتطبيقات
متعددة وهكذا
usr ملفات المستخدمين عامة والمكتبات البرمجية الخاصة بتطبيقات
المستخدمين كلهم وملفات المساعدة كذلك ... واضح طبعا إني احنا
قدام نظام متعدد المستخدمين
var جميع ملفات المتغيرة والمؤقتة الخاصة بمستخدمي النظام من تقارير
وملفات ايميلات وملفات انترنت مؤقتة وهكذا



طبعا مقارنة بالمجلدات الموجودة داخل توزيعتك ... إذا كانت سوزة ... أو أي توزيعة أخرى ... دائما ما يوجد بعض المجلدات الزائدة الخاصة بالتوزيعة ولكن عامة لا يكون معناها غامض أو ذات وظيفة مجهولة ... والمذكور اعلاه عبارة عن المعيار اﻷساسي لنظام ملفات اللينكس ويمكنه متابعة ذلك من خلال أمر man hier ..

من ناحية أخرى لا تقلق من بعض المجلدات التي لم ترى لها أي معنى حتى اﻵن ... فسنحاول تباعا بإذن الله تفصيل هذه المجلدات ... ولكن عندما يحين استخدامهم وذلك لتمام اﻷستيعاب والتحصيل
دلوقتي احنا خدنا نظرة عامة وشاملة وكلية عن نظام الملفات ككل .. ولو فيه حاجة تعباك شوية مش أزمة ... ﻷني احنا هنبدأ نفصل شوية فيما ذكرناه آنفا